ਕਦੇ ਸੁਣੀ ਹੈ ਤੂੰ
ਇਕ ਖਾਮੋਸ਼
ਜਿਹੀ ਚੀਖ਼?
ਵਗਦੇ
ਪਾਣੀਆਂ ਦੀ ਚੀਖ਼
ਤੇ ਉੱਚੇ
ਮਹਿਲੀਂ ਵਸਦੀਆਂ
ਰਾਣੀਆਂ ਦੀ
ਚੀਖ਼
ਪਿਘਲ਼ਦੇ
ਹੋਏ ਸ਼ੋਖ ਪਹਾੜਾਂ ਦੀ ਚੀਖ਼
ਤੇ ਟੁੱਟਦੇ
ਹੋਏ ਚਮਕੀਲੇ ਤਾਰਿਆਂ ਦੀ ਚੀਖ਼ …
ਉਜੜੇ ਹੋਏ
ਗਰੂਰੀ
ਐਤਬਾਰਾਂ
ਦੀ ਚੀਖ਼
ਤੇ ਕਾਲੀਆਂ
ਹਨੇਰੀਆਂ ਰਾਤਾਂ ਨੂੰ
ਕੋਠਿਆਂ
ਵਿੱਚ ਛਣਕਦੇ
ਘੁੰਘਰੂਆਂ
ਦੀ ਚੀਖ਼…
ਹਾਂ!
ਤਪਦੀ
ਰੁੱਤੇ ਰੇਗਿਸਤਾਨਾਂ ਦੀ ਚੀਖ਼
ਤੇ ਢਲਦੇ
ਅਰਸ਼ੀਂ
ਡੁਬਦੇ
ਸੋਹਣੇ ਸੂਰਜ ਦੀ ਚੀਖ਼
ਰੰਗਾਂ
ਵਿਚੋਂ ਚਿੱਟੇ ਰੰਗ ਦੀ ਚੀਖ਼…
ਤੇ ਰੰਗੀਨੀ
'ਚ ਬੇਰੰਗ ਹੋਏ ਓਸ ਫੁੱਲ ਦੀ ਚੀਖ਼…
ਦੱਸ ਖਾਂ?
ਕਦੇ ਸੁਣੀ
ਹੈ ਤੂੰ ਵੀ ਕੰਨ ਲਾ ਕੇ ….
ਉਹ ਚੀਖ਼ ਜੋ
ਮੈਂ ਅਕਸਰ ਸੁਣਦੀ ਹਾਂ..
ਬਿਰਹੋਂ ਦੀ
ਰੁੱਤੇ ..
ਪ੍ਰੀਤਮ
ਤੋਂ ਮਹਿਰੂਮ ਹੋਈ ਰੂਹ ਦੀ ਚੀਖ਼ ...
ਸਾਂਵਲ
ਪਿਆਰੇ ਯਾਰ ਨਾਲ ਮਿਲਣ ਦੀ ਆਸ 'ਚ
ਉਸ ਪਿਆਰੀ
ਯਾਦ ਲਈ , ਗਲਦੀਆਂ ਉਮਰਾਂ ਦੀ ਚੀਖ਼…
ਕਦੇ ਸੁਣੀ
ਹੈ ਤੂੰ ,ਇਕ ਖਾਮੋਸ਼ ਜਿਹੀ ਚੀਖ਼?
ਲਿਖਤ-ਨਿਸ਼ਾ ਸ਼ਰਮਾ
No comments:
Post a Comment